In sto amaro momento, in sto ultimo sfogo de amor, de fede al Veneto Serenissimo Dominio, el gonfalon de la Serenissima Repubblica, ne sia de conforto, o citadini, che la nostra condota pasada, che quela de sti ultimi tempi, la ne rende più zusto sto ato fatal, ma doveroso par nu.
Savarà da nù i vostri fioi, e la storia del zorno la farà saver a tuta Europa, che Perasto la ga degnamente sostegnudo fin a l’ ultimo l’ onor del Veneto Gonfalon, onorandolo co sto ato selene e deponendolo bagnà da el nostro universal, amaro pianto.
Sfoghemose, citadini, sfoghemose pur; ma in sti nostri ultimi sentimenti, che i sigila la nostra gloriosa corsa soto el Serenissimo Veneto Governo, rivolgemose verso sta Insegna che lo rapresenta, e su de ela sfoghemo el nostro dolor.
Par 277 ani la nostra fede, el nostro valor, la sempre custodia par tera e par mar, par tuto indove che i ne ga ciamà i so nemisi, che li xe stai pur queli de la Religion. Par 377 ani le nostre sostanze, el nostro sangue, le nostre vite, le xe sempre stae par Ti, S. Marco; e felicissimi sempre se gavemo reputà, TI CO NU, NU CO TI; e sempre co Ti sul mar nu semo stai ilustri e virtuoxi. Nisuni co Ti ne ga visto scampar, nisuni co Ti ne ga visto vinti e spauroxi!
E se sti tempi presenti, infelici par imprevidensa, par disension, par arbitrii ilegali, par visi ofendenti la natura e el gius de le xenti, no Te gavese cavà via, par Ti in perpetuo sarave stae le nostre sostanse, el nostro sangue, la nostra vita, e piutosto che vedarTe vinto e dexonorà dai Toi, el corajo nostro, la nostra fede, se gavarave spelio soto de Ti.
Ma xa che altro no ne resta da far par Ti, el nostro cuor sia l’ onoratissima To tomba, e el più puro e el più grando To elogio le nostre lagreme.