翀翀一歲生日會之後, 21號正日生日決定去Disneyland玩兩日住一晚酒店! 幸好翀翀的傷風已經好番好多, 差點以為這個兩日一夜之旅要泡湯. 平時翀翀最鐘意出街, 今次一連玩足兩日絕對滿足晒佢嘅願望, 除了Coffee Cup, Lion King Show & 穿梭機未玩, 我哋通通都玩晒啦! 翀翀玩機動遊戲唔驚又唔扭計, 仲眼仔睩睩四圍望, 真是一大驚喜! 佢唔鐘意Mickey & Minnie, 反而見到Piglet & Pooh會笑咪咪, 見到佢咁我哋都好開心.

翀翀第一次出外留宿, 雖然住得一晚都執咗好多嘢帶去, 唔知仲以為我哋去旅行. Check-in後小休一會12:30才入樂園玩, 一直玩到放完煙花先返酒店食buffet. 呢晚翀翀好乖仔, 佢肯坐在Highchair睇住我哋食, 又不時講BB話把玩手上的杯&匙, 連Disney的員工都讚佢乖, 抵錫^^

喺Disney慶祝生日真係唔錯, 有Mickey同我哋一齊唱生日歌, 演藝人員又好nice幫我哋影相拍video, 抵讚! 翀翀同Piglet玩得最開心, 可能佢近得我多見我鐘意粉紅, 佢又跟咗我, 比翀爸話我搞到個仔鐘意粉紅色. 我就話翀翀見Piglet個樣純品先鐘意, 同粉紅無關. 翀翀在餐廳玩到10:00都仲鬼咁開心, 唔記得咗要飲奶奶瞓覺, 返到房繼續在BB床跳來跳去, 搞到成11點幾先肯瞓. 睇嚟翀翀同我哋一樣鐘意去旅行, 絕對係一件好事!