Eins og undanfarin sumur lagði ferðahópurinn land undir fót og nú var haldið á Vesturland, nánar tiltekið í Dali og Snæfellsnes. Lagt var af stað föstudaginn 27. júní og komið heim aftur sunnudaginn 6. júlí. Gist var að Stóra Vatnshorni í Dölum, Snjófelli við Arnarstapa og Gíslabæ (Grímsbæ eða Grimsby eftir atvikum!) á Hellnum. Veður var með afbrigðum hlýtt en þó viðraði aldrei til ferðar á Snæfellsjökul sökum þoku. Við létum það þó ekki á okkur fá heldur nutum stórbrotinnar náttúru og gestrisni heimamanna hvar sem komið var. Einkum viljum við þakka forsvarsmönnum Mjólkursamlagsins í Búðardal höfðinglegar móttökur. Myndir eru teknar af Bolla Valgarðssyni og Halldóri Jónssyni. Um einstaka staði sem komið var við á má fræðast nánar með því að smella á tengla, sem víða eru í einstökum myndatextum. Einnig má lesa nánar um svæðið í verkefni nokkurra nemenda Fjölbrautaskóla Vesturlands HÉR.

Nú þegar er farið að spá og spekúlera í viðfangsefni næsta sumars. Norðurland er eftir, allt austur á Langanes. Einnig er Suðurland eftir austur til Smyrlabjarga og svo náttúrlega er Reykjanesskaginn ófarinn af flestum. Færi maður þangað gæti maður gist heima hjá sér! Reyndar hefur verið minnst á önnur lönd, t.d. Norrænuferð til Hanstholm, bíltúr til Finnlands og siglingu heim frá Bergen. Það gæti orðið spélegt ferðalag - en verður, hygg ég, snúið að sannfæra allan hópinn. En vissulega er hugmyndin freistandi!

This gallery shows our trip to the west area of Iceland, Dalasysla og Snæfellsnes.