Ang pagpuyo sa Carcar tingali mao ang usa sa labing maayo nga desisyon nga nahimo sa akong mga ginikanan.

Ang Carcar nga anaa tunga-tunga sa isla sa Sugbo abunda pirmi sa pagkaon ug mga lagutmon. Mao kini nga daghan sa atong mga katiguwangan ang maayo mangluto o manimpla ug lami.

Usa sa mga lami nga pagkaon sa Carcar mao ang sikat na kaayo nga letson baboy o “inasal”. Naa kini templa nga lahi kaayo komparar sa uban pang mga letson sa uban pang lugar.

Sa Carcar, walay kombera nga dili mag-asal og baboy. Kon ang imong hikay walay inasal nga baboy, nahisama ra kini tingali sa pagkaligo nga wala manabon.

Lahi kaayo ang kaon kon walay nag-ubo nga inasal sa tunga sa lamesa; busog ka inigkahuman pero paminaw mo adunay kulang.

Kagubkob nga panit, lumo nga unod ilawom sa gusok, ug ang timpla nga nanuhot-suhot sa tanang parte niini ang pipila lang sa dili nimo malimtan sa inasal sa Carcar. Wala pay labot niini ang kahumot nga magsuroy-suroy sa kasilinganan inigsugod na og tadtad.

Tingali tungod kini sa mga lamas nga sa Carcar lang makit-an, o ba kaha tungod sa sekreto nga pamaagi sa pagluto niini nga nasunod na gikan sa mga katiguwangan.

Ilado na kaayo kini sa tibuok Sugbo ug sa lain-lain pang lugar sa Pilipinas. Daghan na kaayong nakatilaw niini bisag dili lumulupyo sa lungsod. Maslami kay sa letson sa Manila kay kon parehas pa, dili na unta ma-embento ang Mang Tomas.

Pila na kaha sa mga inasal sa Carcar nga nakasakay na og ayroplano? Kay daghan man kaayong mouli ug moanhi para magdala og letson inigbalik nila sa ilang tagsa-tagsang dapit.

Mas nakasakay pa tingali og ayroplano ang inasal kay sa mga tigluto niini!

Ug kon nganong lami gyod kaayo ang atong inasal nga baboy? Ang usa lang ka tinuod nga Carcaranon ang nahibalo sa sekreto.

Gusto ba mong mahibalo? Suroy o puyo sa Carcar.