Árlega förum við Hrafnhildur, Einar og Halla og Örn og Begga í óvissuferð. Fyrsta ferðin var farin 2007, þá fóru konurnar með okkur í algera óvissu og ári síðar tókum við strákarnir við. Ferðin í ár var á okkar vegum. Við byrjuðum í morgunkaffi kl. 8 hjá Erni og Beggu föstudaginn 20. janúar. Við ókum til Grindavíkur, þar sem Þorsteinn Gunnarsson, upplýsingafulltrúi bæjarins, ætlaði að sýna okkur Saltfisksetrið, en gat það svo ekki þegar á reyndi. Við héldum för okkar áfram í blindhríð, svo ekki sá á milli vegstika, um Suðurstrandarveg til Herdísarvíkur og áfram til Þorlákshafnar, þar sem Viggó Dýrfjörð og kona hans, Barbara Guðnadóttir menningarfulltrúi, tóku á mótti okkur í Ráðhúskaffi. Þaðan héldum við til listakonunnar Dagnýjar Magnúsdóttur í Höndum í höfn sem kenndi okkur fyrstu skrefin í glerlist. Eftir listsköpum héldum við til Eyrarbakka og skoðuðum Húsið, elstu timburbyggingu landsins. Að því loknu heimsóttum við Björgvin orgelsmið á Eyrarbakka og Elfar listmálara. Um kvöldmatarleytið héldum við til Dalbæjar III í Hrunamannahreppi, þar sem við gistum í tvær nætur. Laugardaginn 21. skoðuðum við Eldgosasafnið á Geysi, litum við hjá Gullfossi og fengum okkur kjötsúpu á veitingastaðnum þar. Að því loknu heimsóttum við Sigrúnu og Sigurjón, mjólkurbændur í Kotlaugum, sem sýndu okkur fjósið eftir að hafa hellt flösku af Konna ofan í gestina! Það fór ekki á milli mála að samferðarmönnum mínum þótti heimsókn til þeirra hjóna það sem uppúr stóð í ferðinni. Síðan var haldið heim til Dalbæjar á ný, þar sem Örn hóf matarundirbúning meðan við Immer fórum til Selfoss að sækja meiri bjór, enda 70 dollur hvergi nærri nóg. Að nautasteik og kvöldgöngu lokinni var lagst í pottinn undir stjörnubjörtum himni og síðan lagst til náða. Á sunnudegi var haldið til Þorlákshafnar á ný til að ná í glerlistina áður en ekið var heim á ný. Toppiði þetta stelpur!