Í árlegri sumaferð BÍP 2014 héldum við til á Hótel Núpi dagana 5. til 11. júlí. Það er rétt að taka það fram strax að í 15 árlegum ferðum hópsins hefur okkur aldrei liðið jafn vel á einum stað og í ár í umsjá Guðmundar hótelstjóra á Núpi enda aðstaðan þar með eindæmum þægileg og heimilisleg og gestrisni staðarhaldara einstök.

Í ferðinni heimsóttum við Bettý á Ingjaldssandi, skoðuðum lystigarðinn Skrúð og Botnsskóg í Dýrafirði, litum uppá Bolafjall, hjóluðum í Skálavík, fórum um götur Bolungarvíkur og Ísafjarðar undir leiðsögn heimamanns (og meðlims BÍP), hjóluðum Óshlíðina og Bolungarvíkurgöng (sem ættu að heita Óshlíðargöng), heimsóttum Íslenska kalkþörungafélagið á Bíldudal, þar sem við þáðum í upphafi hádegisverð hjá Hafdísi Gísladóttur og eiginmanns hennar, Einars Sveins Ólafssonar, framkvæmdastjóra fyrirtækisins. Við gengum líka uppí hyrnu Dufansdalsnúps í Fossfirði í Arnarfirði til að skoða göng surtarbrandsnámunnar sem þar eru. Einnig gengum við út með Hesti sem skagar út í Ísafjarðardjúp milli Hestfjarðar og Seyðisfjarðar. Undir lok ferðalagsins hjóluðum við inn Önundarfjörð frá aðalveginum vestur, út fjörðinn hinum megin og áfram út Önundarfjörð til Valþhófsdals og allt til baka til Flateyrar. Þar tók Sleggjan á staðnum á móti okkur, Bryndís Sigurðardóttir, framkvæmdastjóri sjávarútvegsfyrirtækisins Arctic Odda, ásamt stjórnarformanni þess, Sigurði Péturssyni, framkvæmdastjóra Dýrfisks.

Þetta var í alla staði ánægjuleg ferð, við sluppum fyrir horn með veðrið. Ferðalagið hófst með hávaðaroki og stórrigningum, en þó einkenndust nær allir ferðadagar af mildu og þægilegu veðri sem kom í veg fyrir að maður væri að drepast úr hita í mollunni. Það munaði samt mjóu eitt síðdegið!