Húsmúlarétt (Kolviðarhóll) og nágrenni Lyklafells vestur af Marardal - sep. 2009
Fór aldrei þessu vant í réttir þetta haustið. Í Húsmúlarétt við Kolviðarhól. Hef farið þangað af og til, síðast líklega í hitteðfyrra. Þá hitti ég m.a. Palla á Sandhóli með sprungið dekk á traktornum. Við töppuðum dekkið svo hann kæmist með féð heim í Ölfus. Nú hitti ég ekki Palla nema rétt í svipinn en fann hins vegar hundinn hans lengst úti á heiði, ráðvilltan og auman. Skutlaði honum uppí rétt enda var hann á leið í öfuga átt. Eftir réttir fylgdi ég slóð af nýjum lagnavegi Orkuveitunnar vestur frá Kolviðarhóli í átt til borgarinnar. Norður af Stangarhóli liggur gömul slóð norður fyrir og með Lyklafelli til austurs, samhliða lagnaveginum en nær eingöngu með gömlum árfarvegi allt til virkjunar- eða dæluhúss OR við Bolavelli. Eins og sést á myndunum eru allar myndirnar teknar á vegslóð, sú fyrsta er reyndar alvöruslóð, sem lögð hefur verið með alvörutækjum beint af augum - enda málefnið göfugt - að koma vatni í krana borgarbúa. Hin sýnir eldgamla slóð fyrir Lyklafell.
Sigurbjörg Jóhannesdóttir (Bíbí) á Nautaflötum og Halldór Magnússon frá Hraunsnefi
Féð komið í rétt
Rekið inn
Ekið í vestur
Horft í átt til Suðurlandsvegar skammt vestan Sandskeiðs