Okkur hafði lengi langað í dagstúr til Vestmannaeyja, að hjóla um bæinn og nágrenni. Tækifærið gafst ekki fyrr en Landeyjarhöfn var tekin í notkun. Þá létum við til skarar skríða, pöntuðum miða og fórum austur snemma morguns. Úr "bænum" er tveggja tíma akstur að Landeyjarhöfn. Við skyldum bílana eftir og hjóluðum um borð, bundum hjólin og fórum uppá þilfar. (Ef ég þarf einhvern tímann að fara til Vestmannaeyja, t.d. vegna vinnu, mun ég taka hjólið með mér til að þurfa ekki að hanga í 300 metra röð. Maður hjólar bara beint um borð). Skipið fór 10.30 og kom til Eyja 11.10. Bessi er ættaður úr Eyjum og öllum hnútum kunnugur. Hann leiðsagði. Byrjaði á að fara með okkur niður að höfn og nágrenni og síðan fengum við okkur að að borða. Eyjamenn eru enn að átta sig á byltingunni, sem Landeyjarhöfn hefur valdið, og munu án efa ná upp meiri afköstum í þjónustu við ferðamenn. Maturinn var góður. Síðan hjóluðum við til Stórhöfða, út fyrir flugvöll, með Eldfelli og inní bæinn aftur. Fengum okkur hressingu og þá var klukkan langt gengin í sex og tímabært að fara um borð í ferjuna aftur. Mæli eindregið með dagsferð til Eyja. Nær allar myndir tók Skúli Skúlason af sinni alkunnu snilld.