Þetta átti að vera „stutt“ helgarferð. Hún verður þó líklega um sinn amk í minni sumra samferðarmanna. Upphaflega ætluðu félagar á 6 bílum í ferðina. Þegar til kom mætti helmingurinn, þar af varð sá fjórði að hætta við strax á brottfarardegi þegar bensínrör gaf sig á bensínstöðinni þaðan sem hópurinn hélt af stað laugardaginn 28. mars. Á síðustu stundu bættust góðir ferðafélagar í hópinn, Davíð og Þorbjörg, sem Rikki þurfti svo sannarlega á að halda daginn áður þegar gírkassinn gaf sig enn eina ferðina. Davíð var nýbúinn að skipta þessum kassa út fyrir annan öflugri í Rubicon. Þannig að á endanum fórum við á þremur bílum: Bolli og Laker (Þorlákur Björnsson), Rikki og Steini, sem ætlaði með Einari Gylfa en flutti sig yfir til Rikka þegar Trooperinn hætti við að fara, og Þorbjörg og Davíð.

Leiðin lá til Húsafells, þar sem fyllt var á tankana. Þaðan var haldið inná Arnarvatnsveg, skammt frá Kalmanstungu og upp á heiði. Lítill snjór var á heiðinni en þeim mun meira af grjóti. Árnar á leiðinni voru mesti farartálminn auk krapa er nær dró Hveravöllum, þangað sem við komum fremur seint. Á sunnudag brast á með sól svo ákveðið var að „sprauta“ yfir jökul. Það endaði með 12 tíma ferð og gönguhraða nær alla leið til Húsafells. Urður, Verðandi og Skuld gerðu tvær tilraunir til að sannfæra okkur um að fara bara suður Kjöl með því að meina okkur uppgöngu á jökulinn, fyrst með svellbunka upp með girðingunni við Oddnýjarhnjúka svo ekki var séns í helvíti að komast þar upp, og svo við Þjófakróka. Þá þustum við vestur fyrir Fögruhlíð og brunuðum þar upp, milli Fögruhlíðar og Innra-Sandfells. Þar snérum við á þær systur! Veðrið á jökli var eins og best varð á kosið en færið erfitt. Gönguhraði nær alla leið og Bolli að verða olíulaus er yfir lauk í Þjófakróki. En Aron reddaði kallinum. Hann kom með 9 bílum sem birtust siglandi í kjölfar okkar skammt vestan Þursaborga eins og ísbrjótar á leið til Suðurskautslandsins. Einhverra hluta vegna fór hraðinn á þeim niður í 2 km klst. við það að hitta okkur. Þannig tuttlaðist hópurinn í sameiningu til Húsafells. Við komum heim um miðnætti. Þreytt!